धरान । नेपाली कांग्रेसका नेता डा शेखर कोइरालाले अस्थिरता चाहने तत्वहरुले देशलाई जातीय र धार्मिक द्वन्द्वमा धकेल्न कोशिश गरिरहेको बताएका छन् ।
देशमा साम्प्रदायिक द्वन्द्वको बिजारोपण गरेर सामजिक–धार्मिक सदभाव बिथोल्न खोजिंदैछ, त्यो हामी कदापि स्वीकार्न सक्दैनौं– कोइरालाले भने।
धार्मिक मुद्दाले पेचिलो बन्दै गएको धरान पुगेर नेता कोइरालाले हरेक भाषाभाषी र जातजातिलाई आफ्नो धर्म मान्न पाउने अधिकार संविधानले ग्यारेन्टी गरेको भन्दै धर्मका नाममा राजनीति गर्न नहुने बताए ।
उत्तेजना र बहकाउमा नलागी जातीय र धार्मिक सदभाव कायम गर्दै संयमित हुन कोइरालाले धरानबासीलाई आग्रहसमेत गरे। धार्मिक र जातीय सहिष्णुतामै नेपाली समाज अडेको कोइरालाले प्रष्ट पारे ।
नेपाली कांग्रेस सुनसरी क्षेत्र नं–१ ले सञ्चालन गरेको ‘ग्रिन एण्ड क्लिन धरान अभियान –२०८०’ को समापन कार्यक्रमलाई सम्बोधन गर्दै कोइरालाले यदि कुनै एक ठाउँबाट साम्प्रदायिक फैलिए त्यसको ज्वाला देशैभरि जाने खतरा रहेको पनि बताए ।
